第二次考牌定了在8月1日,去到7月23號先去開始補鐘,基本自已幫手做助選工作,忙到訓都無時間,考乜鬼呀,要師傅打來催先話,補就補啦,無心機考,肥佬就罷就,次次補鐘都唔夠訓時補,今次仲要係第二個試場再加s位,補了十個鐘,就上場考了, 去到試場,睇到個考牌官咁熟面口既,咪就係上次肥我個位囉, 我話唔係咁黑仔呀, 真係山水有相逢? 唔會咁橋考番我卦, 點知六合彩又唔見你中,坐上來真係佢呀!!!!!!
我當然扮唔知,咪照考囉...掉頭ok, 跟住最驚既泊位都掂埋, 跟住路試,今次有咁慢得咁慢來開,順順利利返到試場,我估掂卦,等叫名, 搞掂! 超開心! 頭搭尾兩次考車用了七千元,好彩唔使考第三次o者
8月8日 係奧運幕,亦係我去拎牌的日子,拎左正式車牌,可以開車了,老友小豬達安排我開車,佢就開工,晚上無睇開幕禮去練車,由屋企出發,遊勻成個大埔,再衝上舊路去左中文大學,佢話我喎,我係大路之王,一條路開得好好,要轉彎就死晒...大佬第一日牌咋,仲要開自動波私家車,想點喎,俾d時間我練下嘛,玩到半夜,請佢食宵夜,回家很滿足
9號,上午到中午,開完選舉會,去探我老友,又找了老友阿水,開佢架車,由土瓜灣出發,去了黃埔,行公主道,上窩山,再由何文田返土瓜灣,上番車場泊車,點泊都點唔番入個位,都係要佢出馬先搞得掂,佢話我基本上ok,都係轉彎泊位唔多得,要練呀!
有冇人介紹有平靚二手車, 10000左右, 上山夠力就得了
朋友話錦田d車場4000蚊都有, 睇你夠唔夠膽買囉
